Euskadiko industriako digitalizaziorako eta artezketarako nodoa jaio da

Teknologia aurreratuak enpresei transferitzen laguntzeko eta industriaren lehiakortasuna indartzeko asmoarekin, gaur goizean Digital Grinding Innovation Huba (DGIH) inauguratu dute euskal zentro teknologikoak eta DANOBATGROUP industri taldeak. Digitalizazioaren eta industriako artezketaren alorreko soluzio berritzaileak ikertzeko eta garatzeko Euskadik duen nodo berria da.

Ikerketa erakundeak Elgoibarko udalerri gipuzkoarrean dituen instalazioetan kokatuta dago gunea, eta DANOBATGROUPen bultzadarekin eratu da.

Inaugurazio ekitaldia Iñigo Urkullu Renteria lehendakariak presiditu du, eta bertan egon dira Ekonomiaren Garapeneko eta Azpiegituretako sailburu Arantxa Tapia eta Gipuzkoako Ekonomia Sustapena, Landa Ingurunea eta Lurralde Orekako diputatua Ainhoa Aizpuru, besteak beste.

Ekitaldian egon dira, halaber, DANOBATGROUPeko zuzendari nagusi Pello Rodriguez, IK4-IDEKOko zuzendari nagusi Nerea Aranguren eta MONDRAGON Korporazioko lehendakari Iñigo Ucin.

DGIHa, non 6 milioi euro baino gehiago inbertitu baitira ekipamenduan, elkarlanerako gune bat da, eta bertan industriako digitalizaziora eta artezketa teknologiara zuzendutako ikerketa proiektuak esperimentatzen, frogatzen eta balidatzen jardungo dute nagusiki.

Ekoizpen plantetan interneten ondoriozko teknologiak erabiliz gauzatu da iraultza digitala edo 4.0 industria, lantegi adimendunak eta interkonektatuak eraikitzeko. Testuinguru horretan, Digital Grinding Innovation Hubaren ekipo guztiak elkarrekin konektatuta egongo dira, makinek eta mekanizazio prozesuak ematen duten informazioa urrutitik eta denbora errealean eskuratu ahal izateko.

“Digitalizazio ingurune horren barruan, makinaren osagaien egoera, mekanizazio prozesuak definitzen dituzten aldagaien optimizazioa eta energiaren kontsumoa ezaugarritzeko sistemak landuko dira. Horrela, hutsegiteei aurrea hartu, mantentze lan prediktiborako estrategiak aktibatu eta energiaren aurrezpena eta ingurumeneko inpaktua txikitzea dakarten alternatibak esperimentatu ahal izango dira”, ziurtatu du Arangurenek.

Azken belaunaldiko makinak dituenez, DGIHak artezketako teknologien ikerketan ere jardungo du, izan ere, artezketa da pieza osagai industrialen fabrikazio prozesuetako faserik kritikoena sektore estrategiko batzuetan, hala nola energiaren sorreraren, tren garraioaren, aeronautikaren edo ekipo ondasunen sektoreetan.

Material berriekin eta aleazio bereziekin fabrikatzeko I+G proiektuak garatzea ez ezik, forma eta geometria konplexuen artezketa, hozketaren optimizazioa, diamantatzeko teknologia eta artezketa ekologikoa ere bilatzen ditu hub-ak

Gunearen helburuen artean daude, halaber, industria digitalera bideratutako profil profesional berrien prestakuntza eta trebakuntza, makinen funtzionamendua ulertzeaz gain datuak atzitzeko gailuen bitartez fabrikazio prozesuetatik ateratzen den informazioa interpretatu eta analizatu ahal dezaten.

Digital Grinding Innovation Hub artezketa eta digitalizaziorako nodo berriaren funtzionamendua bermatzeko, besteak beste DANOBAT fabrikatzailearen azken belaunaldiko makinez, SORALUCEren funtzio askoko fresatzeko makinez eta datuen atzipen aurreratuan espezializatutako FAGOR AUTOMATIONen ekipoez hornituko da gunea, eta proiektuak aurrera egin ahala beste makina batzuk gehituko zaizkio.

Lankidetza, arrakastarako gakoa

Digital Grinding Innovation Huba proiektu erabat irekia da, eta lankidetza eta sinergiak bultzatzea bilatzen du, artezketa prozesuetako eta industriako digitalizazioko balio katean inplikatuta dauden zentro teknologiko, unibertsitate, enpresa, hornitzaile, erabiltzaile, enpresa txiki eta ertain eta start upen artean.

Gunea, zeinak industrializaziotik oso hurbil dauden soluzioen probak eta saiakuntzak egiteko balioko duen, kokaleku askoko proiektua da erabat. Izan ere, IK4-IDEKOren instalazioetan ez ezik, beste leku batzuetara ere zabaltzen da, hala nola Euskal Herriko Unibertsitatera (EHU), Mondragon Unibertsitatera edo Makina-erreminten Institutura (IMH), ekimen honetan laguntzen duten erakundeak baitira.

Hub-ak Zientzia, Teknologia eta Berrikuntzaren Euskal Sareko hainbat eragileren laguntza dauka, besteak beste hauena: CFAA, CEIT-IK4 edo AOTEK. EKIN, Unnesa edo Korta Group erakundeek, berriz, babesa erakutsi diote gune horri, benetako fabrikazio baldintzetan funtzionatuko duen froga leku bat edukitzeko aukera emango dielako.

“Agente horiek guztiek beren ahalmenak batuko dituzte, industriako fabrikazioaren abangoardian jarraitzen utziko diguten aliantza nazionalak eta internazionalak bilatzera zuzendutako leku bat eraiki ahal izateko. Eraikitzen ari den proiektu bat da, eta berarekin bat egin nahi duten ekipoen fabrikatzaile, osagarrien hornitzaile eta mekanizazioko espezialistentzat irekita dago”, gaineratu du Arangurenek.

Ekimenak, halaber, balio erantsi handiko industri fabrikazioan espezializatutako erakunde internazionalen laguntza dauka, hala nola SCHAEFFLER alemaniarrarena, Frantziako SAINT GOBAIN, Austriako TYROLIT edo Bremengo Unibertsitate alemaniarrarena.

DANOBATGROUPeko zuzendari nagusi Pello Rodriguezek, berriz, uste du “DGIHak Euskadiren posizionamendua indartzeko balioko duela, balio erantsi handiko fabrikazio prozesuetara zuzendutako artezketa teknologikoen garapenerako gune garrantzitsu gisa duen posizioa sendotuta, euskal enpresa ehunari lehiakorragoa izaten lagunduta, produktu eta zerbitzu bereziak, teknologikoki aurreratuak, iraunkorrak eta berrikuntza maila handikoak garatuz”.

Erreferentziako industria talde baten babesa

Industriako fabrikaziora aplikatutako teknologia aurreratuetan ikerketa bultzatzeko DGIHren moduko bikaintasun zentroak sortzea da DANOBATGROUPen apustuetako bat. Izan ere, SORALUCE eta DANOBAT fabrikazio aurreratuaren alorrean erreferente diren enpresek osatutako industri talde honek sektorearen eraldaketei aurrea hartu nahi die, berrikuntza bereizgarrienetako bat duten abangoardiako soluzioak garatuz.

Taldeak, urteko diru sarreren %8 I+G+B-n inbertitzen duenak, eremu honetako esperientziak ditu aurretik. Esaterako, SORALUCEk Alemanian duen bikaintasun zentroa, fresaketa eta torneaketarako teknologiak garatzeko sortutako gunea.

IK4-IDEKOri buruz

IK4-IDEKO euskal zentro teknologikoak 30 urte egin ditu industriako fabrikaziora aplikatutako teknologia berriak ikertzen, garatzen eta berritzen.

MONDRAGON Korporazioaren makina-erreminten enpresen teknologia maila handiko erronkei erantzuna emateko sortu zen, eta gaur egun 100 ikertzaile baino gehiago ditu eta 50 bezero baino gehiagoko zorroa urtean.

I+G+B-ren alorrean garatzen duen jarduera enpresa ehuna lehiakorragoa egiten lagunduko duten soluzio berritzaileak eskaintzera zuzenduta dago, eta 4 ikerketa talde hauen inguruan egituratuta dago: Dinamika eta Kontrola, Fabrikazio Prozesuak, IKTak eta Automatizazioa, eta Doitasuneko Diseinua eta Ingeniaritza.

DANOBATGROUPi buruz

DANOBATGROUP industri taldea MONDRAGON Korporazioaren makina-erreminten dibisioan dago, eta balio erantsi handiko osagaien fabrikaziorako osagaien ekoizpenean, giltza eskura erako ekoizpen sistemetan eta zerbitzu teknologikoki aurreratuetan espezializatuta dago.

1.300 pertsonako plantilla dauka, eta sektore estrategikoetarako soluzio integralak garatu eta saltzen ditu, esaterako, trenen sektorerako, eta energiaren sorkuntzaren edo aeronautikaren sektoreetarako.