Ada Byron sariek, Danobatgroupen babesa dutenek, STEM esparruetako erreferente femenino berriak aurkeztu dituzte 

• Gaur goizean, Patricia Horcajada Cortes eta Alba Gonzalez Alvarez ikertzaileei saria emateko ekitaldia izan da, eta Nerea Aranguren, talde industrialeko zuzendari nagusia, sari banaketan egon da.

• Sariak Deustuko Unibertsitateak ematen ditu, eta sariak babestea emakumeen artean karrera zientifiko-teknologikoekiko interesa bultzatzeko taldeak duen konpromisoaren parte da.

STEM esparruetan erreferente femeninoak izatea funtsezkoa da hurrengo belaunaldiei bidea irekitzeko. Ildo horretan, Emakume Teknologoaren Ada Byron sariek, Danobatgroup makina-erremintan lider den industria taldeak babestutakoek, gazteenen artean bokazio zientifiko-teknologikoekiko interesa sustatzeko erreferente berriak aurkezten dituzte urtero. 

Gaur goizean banatu dira azken edizioko sariak, eta Nerea Aranguren Danobatgroupeko zuzendari nagusia egon da bertan, emakumeen artean talentu zientifiko femeninoa eta STEM karrerak bultzatzeko taldeak duen konpromisoa ikusarazteko. 

Patricia Horcajada Cortesek, IMDEA Energiako Material Porotsu Aurreratuen Unitateko arduradunak eta Materialen Zientziako pertsona nabarmenak, saria jaso du senior kategorian, eta Alba Gonzalez Alvarezek, Ingeniaritza Biomedikoko doktoreak eta Xcure Surgical startuparen sortzaileak, saria  jaso du, halaber, junior kategorian. 

Danobatgroupek helburu berarekin beste ekimen batzuetan parte hartzen du aktiboki, hala nola Gladys Sarietan, IMH Sarietan, Mondragon TFG/TFM sarietan edo First Lego League lehiaketan, eta ekimen horietako bat gehiago da sari honi ematen dion babesa. 

“STEM eremuan emakumeen presentzia funtsezkoa da berrikuntzaren eta jasangarritasunaren aldetik etorkizunean egongo diren erronkei erantzuteko gai den industria bat bultzatzeko, eta sari mota horiek belaunaldi berriak inspiratzen eta bultzatzen dituzten erreferente femeninoak ikusarazten laguntzen dute modu erabakigarrian”, nabarmendu du Nerea Arangurenek.

Gaur goizean, Deustuko Unibertsitateko Ingeniaritza Fakultateak urtero ematen dituen Ada Byron sarien hamaikagarren edizioaren gala egin da Bilbon, eta bertan izan dira Jaione Ganzarain Epelde, Eusko Jaurlaritzako Industria, Trantsizio Energetiko eta Jasangarritasun sailburuordea; Teresa Laespada, Bizkaiko Foru Aldundiko Enplegu, Gizarteratze eta Berdintasun diputatua; Juan Jose Etxebarria, Deustuko Unibertsitateko errektorea; eta Asier Perallos, Ingeniaritza Fakultateko dekanoa eta epaimahaiburua.